東京奧運完咗，相信好多人都同我一樣覺得意猶未盡。今次係我第一次睇奧運睇到咁投入，好開心可以同大家一齊見證港隊歷史性嘅佳績，辛苦晒咁多位運動員🥰
前排睇《龍櫻2》，好鍾意櫻木老師最後講嘅一番說話：
「只有自己可以改變垃圾般嘅人生，人係無法改變他人嘅。但要記住一件事：當你哋一心一意勇往直前時，嗰個身影會成為推動他人嘅原動力。相信自己，勇往直前，總有一日會帶畀別人勇氣同希望。你哋嘅熱忱、努力及同理心，將會鼓舞周遭嘅人，通過呢種良性循環，有朝一日就能改變社會。」
今次香港運動員喺奧運嘅身姿，都畀咗我好多動力。有好幾位運動員提及過「一分一分咁追/一分一分咁打」，我覺得係好inspiring嘅。人有時會覺得自己輸在起跑線，或者人生中途受到挫折以至迷失， 回過神時已經落後太多，就有種點追都已經追唔上嘅感覺，變得好想放棄。但係比賽途中無論處於點樣嘅劣勢你都冇得走咗去，人生亦冇得砍掉重練，只可以調整自己心態，追得幾多得幾多。唔好為自己同他人天賦上嘅差距而絕望，或者太執著以前嘅失敗，搵返自己嘅節奏，保持鎮定。突然爆發反cup超前贏十幾廿分好難，但只要keep住追，最後你贏一分都係贏，就算唔贏你都至少達到自己嘅最佳成績。
盡最大努力一分一分咁追，唔容易，但如果被挫敗感吞噬就感受唔到得分嘅喜悅。做人如是，改變社會亦如是。望住其他制度完善、文化強大、人民質素高嘅國家，而妄自菲薄，覺得呢樣已死嗰樣已死唯有放棄治療嘅話，就真係會抵你輸。想收復失地，追一分可能要十年，但希望終有一日大家可以一齊慶祝勝利。
Search